【做自己做到嘅嘢】
無力感。相信亦係好多人呢一年嘅心情。
間唔中都有人問我點解呢年唔再寫文呀？我諗個原因都係因為呢3個字。
當時721之後，好想多啲中立甚至乎藍絲明白香港究竟發生咩事，覺得如果多啲人企喺同一陣線，更多人支持前線手足，場仗就會贏；雖然我從來都唔精於寫煽情嘅文章，描寫文好差，人物訪問又唔叻，但如果要我去用淺白嘅文字去講道理去分析，我覺得我做得到，所以當初亦都無考慮多唔多人睇，就開始寫，寫到後來有某啲文章好爆好多人傳閱，亦係我始料不及。
直到……大半年後我發現，咩道理都寫過晒喇，個社會根本無改善過，只有差咗，好多嘢都徒勞無功。當然，我都知我天真同心急，無返閒閒地幾十年，又點會咁易有民主丫。但睇住一個又一個被補、還押、定罪，甚至被送中、要流亡，又點會唔心痛，無力感就一層一層堆上去。（天氣咁凍，都唔知七十幾歲嘅黎智英、咁瘦嘅周庭，仲有其他手足點捱……）
如果你以為呢篇文章係畀到正面嘅能量你，sorry，唔係，但我寫出嚟係想話俾同我一樣無力嘅人知 —— 放心啦，唔止得你一個係咁，唔止你一個覺得自己好L廢無嘢做到架。
而我更想講嘅係，喺一個咁差嘅大環境之中，無力但係咪等如完全放棄？可以做嘅嘢唔多，最簡單嘅事你又做咗未先 —— 例如寫信畀手足、例如寫聖誕卡畀12港人。
12港人關注組預備咗聖誕卡，俾全港市民憑卡寄意，上面已經印咗鹽田看守所嘅地址，大家寫完貼上平郵 $2.6 / 空郵$3.4 郵票寄出就可以，等佢哋知道有好多人關心佢哋，亦都等看守所啲人知道12港人受到外界關注、唔敢亂嚟。（至於邊度有得攞聖誕卡呢個問題呢，基本上個個民主派嘅區議員應該都有嘅，再唔係你上網一search 就會見到有唔同嘅街站喇。）
好希望佢哋可以安全返屋企。力量再微小，做自己可以做到嘅嘢，共勉之。
（後記：我呢張聖誕卡係喺岑敖暉擺嘅街站度攞嘅，當日我放工趕到去，咁啱就到見佢哋俾差佬趕，好記得岑敖暉當時好溫柔咁問我係咪要聖誕卡、要幾多張，從佢嘅眼神入面我感受到溫暖，係呀，其實喺呢個咁差嘅環境之中，一直有人好努力。）
#save12 #bringthemback #save12hkyouths #save12hkyouth #十二港人 #12港人 #12港人關注組
Search